Një djalë tetë vjeçar ka fituar çmimin për fotografinë më të mirë. Ai shkrepi një fotografi mahnitëse të një dreri në dëborë në një park në Londër. Sipas BBC, Joshua Cox ishte vetëm gjashtë vjeç, kur fotografoi drerin në Richmond Park janarin e kaluar.
Kur ishte i vogël, Joshua përdorte një aparat fotografik lodër, ndërsa tashmë ka një aparat prej vërteti. Sapo kishte filluar të binte bore, kur Joshua dhe babai i tij Julian Cox, i cili është gjithashtu një fotograf i kafshëve të egra, mbërritën në park.
“Pashë disa drerë dëbore që shkonin në pyll dhe ne i ndoqëm. Ai dukej sikur po lahej në dëborë. Ne u afruam shumë, por sidoqoftë nuk ishim aq afër sa t’i shqetësonim drerët“, ka thënë Joshua, i cili u vlerësua në konkursin “Wildlife Photographer of the Year”.
Ndërsa babi i tij shtoi se, Joshua ka qenë i interesuar për kafshët e egra që i vogël.
“Në të vërtetë ka të bëjë me aventurat që kemi bërë së bashku. Kjo me siguri e frymëzon atë të kapë fotografi të shkëlqyera. Joshua bën fotografi vetëm kur dëshiron, kur e kap frymëzimi dhe zakonisht ai përfundon duke bërë fotografi më të mira se unë. Jam shumë krenar dhe shumë i lumtur për të”, u shpreh babi i Joshua-s.
Ndërsa nuk munguan as këshillat për birin e tij, Joshua, pore dhe për këdo që ka dëshirë dhe pasion të fotografojë kafshët.
“Nëse vëren një kafshë, atëherë thjesht prit që ajo të shikojë në kamerë, sigurohuni që të fokusohet dhe më pas shkrepeni aparatin”, ka thënë ai.
Muzeu i Historisë Natyrore, i cili drejtoi edhe konkursin tha se, Richmond Park, njihet si shtëpia e tufave të drerëve të kuq të cilët kanë bredhur lirshëm që nga viti 1637.
Ky është viti i 58-të i konkursit, ndërsa fotot fituese të dy çmimeve Grand Title dhe Young Grand Title Award, do të shpallen më 14 tetor. /Labirinth
