Këngëtarja Elsa Lila do të mbajë në 1 nëntor në Pallatin e Kongreseve një koncert të madh. Koncerti do të titullohet “Finalmente Elsa” dhe do të mbahet aty, ku sipas saj këngëtares nisi jeta e saj artistike.
“Ika me shijen e suksesit të “Evitës” sime në festival, për t’u rikthyer sërish në Tiranë, tani në nëntor. Këtë herë, për herë të parë 😉 me një koncert të madh, aty në skenën e Pallatit të Kongreseve, nga ku nisi jeta ime artistike. “Finalmente Elsa” i thotë të gjitha: kohën e gjatë që kam pritur, për të ardhur ky moment; punën e madhe që kam bërë deri më sot, për t’u ndjerë kaq gati, për një koncert si ky, që kërkon jo vetëm përkushtimin por dhe pjekurinë e repertorin e duhur artistik”, shkruan Elsa në Instagram.
Ajo shprehet, se nuk do t’ia dilte dot pa bashkëpunëtorët e saj artistë me të cilët ka krijuar projekte unike dhe muzikë të vërtetë.
“S’do t’ja dilja dot kurrë vetëm, pa bashkëpunëtorët e miqtë e mi artistë, me të cilët kam krijuar, intepretuar e realizuar në gjithë këto vite, projekte unike, interesante e me muzikë të vërtetë. Këtë do të bëjmë edhe në koncertin e 1 nëntorit, në Tiranë. Ju mirëpres që të më jepni zemrën dhe duartokitjet tuaja, siç keni bërë gjithmonë, ndërsa unë ju kam dhënë zërin e shpirtin tim ❤️”, shkruan Elsa më tej në Instagram. / Labyrinth
